Shënohet Dita Botërore e Punës Sociale
Në Ditën Botërore të Punës Sociale, Terre des hommes në Kosovë, mbështeti eventin me temë “Forcimi i Solidaritetit Ndërbrezor për Mirëqenie të Qëndrueshme”, organizuar nga Departamenti i Punës Sociale në Universitetin e Prishtinës.
Ngjarja shërbeu si një vend diskutimi për të theksuar rëndësinë e punës dhe shërbimeve sociale në fuqizimin e individëve, shoqërisë dhe komuniteteve të margjinalizuara.
Gjatë kësaj ngjarje, u diskutua mbi zhvillimin e politikave dhe praktikës profesionale në fushën e mbrojtjes sociale, duke vënë theksin si në përparimet, ashtu edhe në sfidat aktuale. Diskutimet u zhvilluan nëpërmjet dy paneleve kryesore, ku ekspertë, akademikë dhe profesionistë trajtuan temat:
- Zhvillimet, legjislacioni dhe politika për mbrojtjen sociale
- Roli i praktikës profesionale: reflektim mbi sfidat dhe mundësitë për mbështetje
Gjithashtu, u adresuan disa nga sfidat në ofrimin e shërbimeve sociale, që janë numri i kufizuar i punëtorëve socialë, që ndikon në cilësinë dhe qasjen në shërbime dhe vështirësitë në parandalimin dhe trajtimin e fëmijëve në situatë rruge, një dukuri shqetësuese në vendin tonë.
Egzona Gashi, koordinatore e Qendrës Ditore të Fëmijëve në Prishtinë, ishte pjesë e panelit të diskutimit me temë “Roli i praktikës profesionale: reflektim mbi sfidat dhe mundësitë për mbështetje”.
Gjatë fjalës së saj, ajo tregoi për punën e Fondacionit Terre des hommes në Kosovë në mbështetjen e studentëve dhe punëtorëve socialë, duke kontribuuar në fuqizimin e tyre profesional përmes trajnimeve, mentorimit dhe mundësive për zhvillim praktik.
Gjithashtu, ajo theksoi përkushtimin e vazhdueshëm të Terre des hommes në inicimin dhe zbatimin e politikave dhe programeve që synojnë përmirësimin e mbrojtjes së fëmijëve dhe forcimin e sistemit të shërbimeve sociale.
Dita Botërore e Punës Sociale shënohet çdo vit në mbarë botën si një moment reflektimi dhe veprimi për të theksuar rëndësinë e punës sociale në fuqizimin e individëve dhe komuniteteve. Në shumë vende, organizohen aktivitete, diskutime dhe fushata advokimi për të adresuar sfidat dhe për të forcuar sistemet e mbrojtjes sociale.
